اوكازيون يا بن آدم,قرب
و من غير شرا,البيع لك أقرب
من كل صنف تلقى,ذوات اتنين!!
لا تقول ده عندي و لا تقول مجرب..
,,,,,,,,,,,,,,,,,,,,
قرب دوق مرار من عند أبو مر
قرب و اللي ميلحقش هو حر
بأي تمن,و اللي تجود به يا محترم
نقول ضحكتك,راحتك ..والباقي يكر
,,,,,,,,,,,,,,,,,,,,,,,
..و ايه رأيك عند ابو كتير,شوية كلام
توزنه و تلونه و تألفه..يا سلام!!
و ده أكتر صنف, بياعينه كتير
و صف زباينه أطول م الايام..
,,,,,,,,,,,,,,,,,,,,
ده سوق تلات و أربع و خميس
و كل يوم,و أي حد و صنف رخيص
بين البايع والشاري يفتح الله
بس الشاري بايع و البياع خسيس
,,,,,,,,,,,,,,,,,,
قرب بيع دماغ وجعتك
خلاص يا محترم,مفيش من يشغلك
و لو فاضلك قلب أو ضمير
عندي زبون في السعر يكرمك
.........
فرصة يا أستاذ وأنا للقرش خدام
هكسب..هاكل مخك بشوية كلام
ما هي دي بضاعتي و دي شطارتي
الحاج أبو كتير علمني أحسن علام
............
و اللي ينزل سوق الكلام عبيط
عمره ما يشتري من بياع حويط
بضاعة تاخدك لكن ما تاخدها
بينك و بين غيرك غاوية تنطيط
,,,,,,,,,,
و كانت مرة يوم نزلت السوق
قلت مش هشتري قبل ما أدوق
و بكيفي دقت المر و عجبني
لكن سرقني و اشتريت قبل ما أفوق
,,,,,,,,,
البياعين قالوا :
خلص الكلام و جبرنا
كسبنا من زبايننا
بشوية هوا و كدب
منهم وفيهم بعنا
,,,,,,
و الزباين قالت:
من حكاوي الماضي اتعلمنا
أننا ما نشتري من باعنا
تهون كل عشرة و كلمة حلوة
زي ما هان عليه وجعنا
,,,,,,,,
خلص السوق
نوفمبر 2007
هناك تعليقان (2):
حلوه قوي بس دي برضه خيانه لااااااااااا للخيانه
مش عارف اقول ايه بس لازم تيجي في براحتي هيه اتعملت و خلاص
و كمان اللون الاحر وجع عيني...اخخ يا عيني
يعني عينك بتوجعك من الاول و طمعان ف قطرة قول و بلاش حجج,,و احمد ربنا اني عرفت اكتب اصلا سواء بقى احمر و لا ازرق :)) ما انت عارف اني كنت محتاسة قوي
إرسال تعليق