رباعيات الطريق,,

يا بخت الدخان من عدم لعدم
يا بخته اللي رايح من غير ألم
من فين و لفين أنا رايح؟
أنا و قلب..وشوية عمر و ألم
...................
عشان الطرق دواير مش بوصل
ولا فارق معايا ايه الي يحصل
راجع هنا تاني,ورايح هناك تالت
لأني ليا بيت عنه مش بسأل
..................
عارف السحاب أن خطاه لمطر
و عارف الطير معنى فراق الشجر
و أديني ماشي ف طريقي,عرفت
أن حلو الكلام بيفضل عبر
..................
لو فين أرض التعب.. بتبان
وخطاوي طايلاها من غير عنوان
كان ليه يا كلام يا حلو الصوت
يا تراب ماشي على تراب مهما كان
.................
يناير2008

رباعية قلب مقـفول,,

بيني و بين موت قلبي لحظة وتفوت
قلتله:"حرام عليك"غلبه السكوت
ملحقتش لسه أحب وأعشق,قال يا سلام
أمال يعني أنا ليه دلوقتي بموت؟؟
,,,,,,,,,,,
زمان أهو راح و بقينا أغراب
زمان قلت بحبك عدد ذرات التراب
و أديني علقت على قلبي يافطة
كتبت عليها.. ممنوع الاقتراب
,,,,,,,,,,,
و يا حب منين أجيب تاني أيام
لأجل اسمع منك العبر و الكلام
أنا عمري راح..لا فهمتك و لا لقيتك
ولاقلتك و اتحسبت عليا والسلام
,,,,,,,,,,,
هل أقدر أقول للعمر متمشيش؟
لحد ما يبان للجناح ريش
الزمن مش تحت أمر القلوب
يستناها لأجل تحب و تعيش
,,,,,,,,,,,
يناير 2008

رباعية عروستي,,

عروسة مربوطة بتلاتين فتلة
تحريكها متعة و حاجة سهلة
بس كتر اللعب دوب الخيط
و اللعبة يوم تقدم متبقاش أحلى
,,عروستي
..........
عروسة قصاقيص و تلاوين
كلمة و ضحكة وحركتين
بس كله قماش و خشب
سوا القلب أو العينين
,,عروستي
..........
عروسة بريئة و شقية
نقيتها من وسط مية
لكن الحــــال انقلب
و عروستي لعبت بيا
,,عروستي
..........
عروستي تبصلي متتكلمش
بغير لها بكيفي الهدوم و الوش
ف يوم جت تقوللي مزاجى كدة
كنت فاكر العروسة متعترضش
,,عروستي
..........
عروستي كانت بادي الأمر عدم
بيها رجع لي ماضي افتكرته اتردم
قالوا لبس البوصة, وكان بيدي
لبستها حلم, و لبست أنا ندم
,,عروستي
...........
نوفمبر 2007

رباعية غربة العاشق,,

آه يا جذر واجعني و مش طايله

بينا الزمن و اللي القلب شايله

اخرج, و ان تبان هقع أنا

يمكن أرتاح من ابن آدم و عمايله

,,,,,,,,,

يا ماضي ياللي انت كل الحاضر

ما انسى أصلي و ان كنت عليك قادر

ذكرياتي هي وطني,هي عشقي

و من يعشق وطنه قد اللي سافر

,,,,,,,,

يا صفحة و صورة ورا كل باب

يا عشرة الوحدة و رفقة العذاب

يا قلب جرحه حبيبه و رحل

أحنا ليه بنحب..ليه أحباب

,,,,,,,,,,,

و ان كان عليا لا كلام ولا لوم

و ان كان عاللي هفتكره,أهو بس يوم

يوم فرحت يوم ما ضعت, و رجعت أبكي

لو أنا دلوقتي ظالم كنت يوم مظلوم

,,,,,,,,,,,,,

قالوا من عشق لقى له وطن

قلت لأمتى غربتي هي السكن

داير ألف فين أرض الحبيب

قالوا من سكن حضنه..لم حزن

.........

فوق الأرض..تحت الأرض

ريح عاتي لكن ورق الشجرة ثابت
سألت نفسي معقول؟تكون الشجرة ماتت
شجرة عنيدة..قبلت تكون حجر
خايفة من اللوم لو مع الريح مالت
,,,,,,,,,,,,,,,,,,,,
و قال بيقولوا عالقطط غدارين
مفكروش القطة بتخربش مين؟
من مــد ايده قاصد لها تتــأذي
ده خوف..انما الغدر م البني آدمين
,,,,,,,,,,,,,,,,,,,,
ليه كل الكلام بقى يهون
لا جــرح يمنع و لا وعد يصــــون
لو بـــس أعــرف ســبب و أفــهمه
أعمل ايه يا حجرعشان زيك أكون
,,,,,,,,,,,,,,,,,,,,
مش كل الدنيا علم و قوانين
يبقى الفعل و رد فعله لمين
لو هو عدم كان ليه اتوجد
كدبت عليا الناس و السنين
,,,,,,,,,,,,,,,,,,,,
لو ابن آدم يراجع نفسه ف اللي فات
كان عرف ان الدود ميعرفش مقامات
و تحت الأرض هيتساوى بغيره
لأنه مش هيندفن ف السما لو مات
,,,,,,,,,,,,,,,,,,,,
نوفمبر2007

رباعيات الحصان الاسود,,

أنا حصان اسود قالوا عنه جميل
قالوا يا بخته قلت:بسواد الليل
من شاف لوني اتقبض, و بعجبهم
بس مش فرسان لأجل يفهموا فالخيل
................
لكل جواد كبوة و مهما تكون كتيرة
يقوم تاني و يرمح ف أرض واسعة كبيرة
لا الدنيا مجرد طريق فيه وقع
ولا الحظ بيمشي على نفس الوتيرة
................
الخيل كاره لجامه الحديد
عايز يفكه و يرمح بعيد
بيحلم يطول منتهى الأرض

الخيل مقلق,لأنه عنيد
.............
بيجري ف الهوا الحر بيطوف
كسر لجام حديد موصوف
السجن محكوم للناس و الطير
مش للي قلبه قتل الخوف
..............
نوفمبر2007

ابن كدب,,

قالوا اش ياخد الريح م البلاط
قلت عايش دور الخسارة و الاستعباط
يصرخ ينوح يلم الناس
يفك و يعقد و يشكي م الرباط
...........
على نفسه بيضحك مش عليهم
بينادي و عمره مايلاقيهم
صحيح ان الاغبيا كتير
لكن أكتر المفتحين عينيهم
............
و صحيح مفيش مطلق او محال
كلمة و عكسها ف كلمة واحدة مش خيال
صدق اي شيء تبقى ف الدنيا عايش
و بلاها تفكير في اللي لك بينقال
.................
نوفمبر 2007

خاين..وفي

سألوك يا عم صابر ازاي ده حصل
سبت وطنك للغريب أول ما وصل
كدة؟من غير ما تحار او تثور
قال متستغربش,و رد على من سأل
..........
لقيته هو اولى لأنه هيعمره
هيعمل اللي عليه ماقدرت و يقدره
اللي ميصونش الغالي منه يزول
و انا سبت الغالي لغيري يكبره
...........
و من جد حب, ما يحب نفسه
ان ساب حبيبه عايش على حسه
يفرح يوم شافه ف السما عالي
اكتر مايفرح.... انه يخصه
نوفمبر2007

لك سلف,,وعليك دين

لو قربت م اللهب كنت عرفت
مين بالدفا يلحقك لو بردت
متلومش النار لو طالتك
ذنبها ايه لو بيها اتحرقت
................
يا هوا بتشيل كلمتين جارحين
من لسان ناس لشوية مساكين
و بتدخل صدور قاسية عشان يعيشوا
مبيهونش عليك تفوتهم ميتين
...............
بتصدق يا غلبان و مين يمنعك
و يسألوك ليه ساكت عاللي بيوجعك
طب ما انت يا شجر بتضلل على بن آدم
و يردهــالك .....بانه يقــطـــعـك
..............
نوفمبر 2007

ببلاش......ببلاش

أنا وعد متقالش عشان يتحقق
أنا الكدب اللي لازم يتصدق
و انا القلب المعروض للايجار
أي ساكن تعبان..خلاص مبقتش ادقق
..................
بس متقولش رخيص,كنت يوم غالي
كان ليا زمان تمن ,كنت سكن عالي
و دخلني فقير معدم, نصاب
صدقته لما قال على قد حالي!!
نوفمبر 2007

تحت الاستيكة,,

و فيك لقيت السر,والرد على السؤال
يا صفحة بين ورق,كلامها وصف المحال
و اترميت انا كلمة..تحت الاستيكة
لا لحقت اتشاف و لا قدرت اتقال
....................
و كأنه مجرد وقت مش عمر
كأن كل الكلام على اللسان حر
يجرح ما يجرح,خلاص اتقال
ماهو مش كل الحب حلو,ولا كل الدمع مر
...................
أنا اللي بكيفي اشتريت العذاب
و أنا اللي عارف ان مفيش اسباب
و عارف انك ندمان ..لكن
ما بينا صار جدار مش باب
..................
أكتوبر2007

سوق أبو كتير

اوكازيون يا بن آدم,قرب

و من غير شرا,البيع لك أقرب

من كل صنف تلقى,ذوات اتنين!!

لا تقول ده عندي و لا تقول مجرب..

,,,,,,,,,,,,,,,,,,,,

قرب دوق مرار من عند أبو مر

قرب و اللي ميلحقش هو حر

بأي تمن,و اللي تجود به يا محترم

نقول ضحكتك,راحتك ..والباقي يكر

,,,,,,,,,,,,,,,,,,,,,,,

..و ايه رأيك عند ابو كتير,شوية كلام

توزنه و تلونه و تألفه..يا سلام!!

و ده أكتر صنف, بياعينه كتير

و صف زباينه أطول م الايام..

,,,,,,,,,,,,,,,,,,,,

ده سوق تلات و أربع و خميس

و كل يوم,و أي حد و صنف رخيص

بين البايع والشاري يفتح الله

بس الشاري بايع و البياع خسيس

,,,,,,,,,,,,,,,,,,

قرب بيع دماغ وجعتك

خلاص يا محترم,مفيش من يشغلك

و لو فاضلك قلب أو ضمير

عندي زبون في السعر يكرمك

.........

فرصة يا أستاذ وأنا للقرش خدام

هكسب..هاكل مخك بشوية كلام

ما هي دي بضاعتي و دي شطارتي

الحاج أبو كتير علمني أحسن علام

............

و اللي ينزل سوق الكلام عبيط

عمره ما يشتري من بياع حويط

بضاعة تاخدك لكن ما تاخدها

بينك و بين غيرك غاوية تنطيط

,,,,,,,,,,

و كانت مرة يوم نزلت السوق

قلت مش هشتري قبل ما أدوق

و بكيفي دقت المر و عجبني

لكن سرقني و اشتريت قبل ما أفوق

,,,,,,,,,

البياعين قالوا :

خلص الكلام و جبرنا

كسبنا من زبايننا

بشوية هوا و كدب

منهم وفيهم بعنا

,,,,,,

و الزباين قالت:

من حكاوي الماضي اتعلمنا

أننا ما نشتري من باعنا

تهون كل عشرة و كلمة حلوة

زي ما هان عليه وجعنا

,,,,,,,,

خلص السوق

نوفمبر 2007

من الرباعيات,,

كان سفر ألاقي فيه و أفارق

كنت فاكرني هعقل, هفهم الفارق

رجعت مضروب على قلبي و عينيا

ليه أتظلم كما لو كنت سارق
............

خلاص اي حاجة في نفسك اعملها

لومها عذبها ,أو حتى اقتلها

مادام اللي كان بيفرحك ..بكاك

لا الدنيا تسوى ولا الكلمة اللي قالها

.............

ياللي مكتف عنيك من باب الخوف

ماشي تتلفت و تلعن الظروف

طول ما انت خايف هتتخبط

و أكتر من اللي خفت منه تشوف

.............

م السما للأرض مبقتش تفرق

حضنت الموج مكنتش مصدق

ياللي مادين ايديكم سيبوني

يا أتعلم أعوم دلوقتي ..يا أغرق

...........

بكره نفسي لما تصدق ظنوني

و برجع أغلط و اسيبهم يكسروني

و القلب بيدق على سبيل التمويه

لا يقولوا ده مات و يدفنوني !!

...........

نوفمبر2007